Plan International Uganda oropo dog Kilaci me Okokolako Primary School

Dul me Plan International Uganda oropo dog Kilaci me Kwan 4 ame anaka ger mwaki 41 okato angec (1983) iyi Okokolako Primary School ame tye isaja Ajuri Igombola Omito itute me dongo pwonyere ikunaca

Ripot ame aedi me school man Alex Acir omio cimo ni ame plan International Uganda pwod pe oropo Gedo me Kilaci man, onwo otino tio kede Wang idiriza calo dogola, arac akato ka icawa ame apwony tye acoc iwi bao otino lwii duc iwang idiriza Kilaci te dong nono.

Ikom Kilaci doge 4 magi, plan International Uganda ogero Coron doge 10 Kun 5 me anyira ame tye kede ka Loko kede wango pads iye eka me awobe te bedo doge 5 Kun me ajo atye kede angwal tye iyie.

Ilokere kede onywal, otino, otela kede opwonye me Okokolako Primary School aworo ikare me miyo Gedo man bot school Patrick Emukure Ilukori ame obedo regional manager me plan International pi tung malu me uganda okobo ni Gedo ni tye me kelo alokaloka icukul man

Emukure okobo ni gin ame plan tye amito niya igedo man obedo medo tek cuny otino ikwan, turu twec ame nwang mio otino pe Kwano calo adwogi me pe akilaci aber, miyo otino Anwang okwero Kwan dok oko icukul, Kato peny irwom amalu kede pe poko atin ka ongwalo, nyako onyo awobi.

Aco aedi me Cukul man Alex Acir okobo ni kadi plan International Uganda oropo wudi Kwan magi aber ento kilaci me Kwan pwod pe tye aromo otino ame ka twere Plan kede Dule okene onyo gamente medi igi Kilaci onyo rop Kilaci ame pe oropo icawa ni

Ento Mp me Saza Ajuri dok Government Chief Whip Denis Hamson Obua okobo ni gin otela otye otute idiro gi ducu me kubere pi neno ni pwonyere iyi Ajuri kede Alebtong alutu odongo me oyotoyot.

Obua okobo ni pwonyere irwom me Cinia iyi Ajuri ocako aber dang ikine me mwaka 2 keken otero Seed Schools 4 iyi Ajuri ame icawa ni gin dok ocako dwaro Jami amako pwonyere pi Ajuri kede Alebtong ni tit.

Aco MP adako me Alebtong District Dorcus Acen okobo ni gin otela otimo ginoro ducu ame mite pi neno ni alokaloka obedo adwong idongo pwonyere me Alebtong.

En odio cuny onywal, otino, opwonye kede otela me Cukul me ye miyo pwonyere bedo nama acel ijami lung ame gin otio pien abongo pwonyere ginoro keken aber pe timere atwali.

Ropo Gedo man medo kede gero coron anyira kede awobe otero wel cente akato 170m oko.

Aco aworo aceli obin oyabu Gedo ame Plan dang ogero icukule okene duc ame tye iyi Alebtong calo Ajobi Primary School ame ogero Kilaci 3 kede office medo kede sollar iye kede Coron anyira, Aloi High primary ame ogero iye Kilaci 2 kede pipa adit me jolo pi Kot, I Fatima Aloi Dem Primary ogero Coron awobe, Awalo Primary School ogero Coron anyira kede Abia Primary School ame oketo pipa adit me gwoko pii kot okio acil.